वसमत शहरात मध्यरात्री थरार! घरात घुसून मारहाण, सशस्त्र दरोडा अन् तरुणीचे अपहरण चार अज्ञात दरोडेखोरांचा धुमाकूळ; बुधवारपेठ परिसरात भीतीचे वातावरण
संपादक उमेश भाऊ साठे ॲक्टिव्ह मराठी न्यूज. विदर्भ मराठवाडा विभागीय संपादक ज्ञानेश्वर कोसलगे ॲक्टिव्ह मराठी न्यूज वसमत. हिंगोली.

वसमत शहरात मध्यरात्री थरार! घरात घुसून मारहाण, सशस्त्र दरोडा अन् तरुणीचे अपहरण
चार अज्ञात दरोडेखोरांचा धुमाकूळ; बुधवारपेठ परिसरात भीतीचे वातावरण

ॲक्टिव्ह मराठी न्यूज | वसमत प्रतिनिधी दिनांक 29
वसमत : वसमत शहरातील बुधवारपेठ परिसरात २८ ऑगस्टच्या मध्यरात्री सशस्त्र दरोडा आणि तरुणीच्या अपहरणाची धक्कादायक घटना घडल्याने शहरात खळबळ उडाली आहे. चार अज्ञात व्यक्तींनी घरात बेकायदेशीर प्रवेश करून घरमालकाला मारहाण केली. त्यानंतर बंदुकीचा धाक दाखवत रोख रक्कम आणि सोन्याची साखळी लुटून नेल्याचा आरोप आहे. याचवेळी घरातील २० वर्षीय तरुणीला जबरदस्तीने सोबत नेण्यात आल्याने परिसरात भीतीचे वातावरण निर्माण झाले आहे.
मध्यरात्री घरात घुसून मारहाण
मिळालेल्या माहितीनुसार, २८ ऑगस्ट २०२६ रोजी पहाटे ३ ते ४ वाजण्याच्या सुमारास बुधवारपेठ येथील एका घरात चार अज्ञात पुरुषांनी संगनमताने प्रवेश केला. त्यांनी फिर्यादीला जबर मारहाण करून त्यांचे हात-पाय बांधले. तसेच बंदुकीचा धाक दाखवत जिवे मारण्याची धमकी दिल्याचे तक्रारीत नमूद करण्यात आले आहे.
यानंतर घरातील ९ हजार २२५ रुपये रोख तसेच फिर्यादीच्या गळ्यातील अंदाजे सव्वा पाच ग्रॅम वजनाची सोन्याची साखळी बळजबरीने काढून घेण्यात आल्याचे पोलिसांत दाखल तक्रारीत म्हटले आहे.
तरुणीला जबरदस्तीने घेऊन गेल्याचा आरोप
दरोड्यानंतर आरोपींनी घरातील २० वर्षीय तरुणीला बंदुकीचा धाक दाखवत जबरदस्तीने सोबत नेल्याचे तक्रारीत नमूद आहे. त्यामुळे या घटनेचे गांभीर्य अधिक वाढले असून नागरिकांमध्ये चिंतेचे वातावरण आहे.
वसमत शहर पोलीस ठाण्यात गुन्हा दाखल
या प्रकरणी दीपक कदम यांच्या फिर्यादीवरून वसमत शहर पोलीस ठाण्यात गुन्हा क्रमांक ०५४९/२०२६ दाखल करण्यात आला आहे. भारतीय न्याय संहिता (BNS) २०२३ मधील कलम 140(2), 309(6), 333, 115(2), 351(2) आणि 3(5) अंतर्गत गुन्हा नोंदविण्यात आला आहे.
पोलिसांकडून तपासाला वेग
घटनेचे गांभीर्य लक्षात घेऊन उपविभागीय पोलीस अधिकारी, वसमत, पोलीस निरीक्षक वाघ, सहाय्यक पोलीस निरीक्षक डेडवाल तसेच पोलीस अंमलदारांनी घटनास्थळी भेट देऊन पाहणी केली.
या प्रकरणाचा पुढील तपास सपोनि डेडवाल करीत असून गुन्हा दाखल करण्याची कार्यवाही पोह/६२८ वाघमारे यांनी केली आहे. आरोपी अद्याप पोलिसांच्या हाती लागले नसून, आरोपींचा तसेच अपहृत तरुणीचा शोध घेण्यासाठी पोलिसांकडून तपास सुरू आहे.
नागरिकांच्या सुरक्षेचा प्रश्न ऐरणीवर
वसमत शहराच्या मध्यवर्ती भागात मध्यरात्री सशस्त्र दरोडा आणि तरुणीच्या अपहरणाची घटना घडल्याने नागरिकांच्या सुरक्षेचा प्रश्न पुन्हा ऐरणीवर आला आहे. या प्रकरणातील आरोपींना तातडीने अटक करून अपहृत तरुणीचा सुरक्षित शोध घ्यावा, अशी अपेक्षा नागरिकांकडून व्यक्त होत आहे.

