
ॲक्टिव्ह मराठी न्युज बीड जिल्हा मराठवाडा विभागीय कार्यकारी संपादक किसन बी पवार* माजलगांव,

(प्रतिनिधी ): दिनांक 4 जुलै.- माजलगांव तालुक्यातील मनुरवाडी येथील जिल्हा परिषद प्राथमिक शाळेतील शिक्षकांच्या सततच्या गैरहजेरीमुळे आणि शाळेतील विविध गैरव्यवस्थेमुळे विद्यार्थ्यांचे शैक्षणिक नुकसान होत असल्याचा आरोप करत ग्रामपंचायत कार्यालय, मनुरवाडीच्या वतीने दि. ३ जुलै रोजी जिल्हा परिषद बीडचे मुख्य कार्यकारी अधिकारी यांच्याकडे लेखी तक्रार अर्ज सादर करण्यात आला.
ग्रामपंचायत सरपंच संजय सदाशीवराव बडवणे, उपसरपंच रमेश लक्ष्मणराव गायकवाड आणि ग्रामपंचायत अधिकारी अशोक दाजीराम गायकवाड यांच्या स्वाक्षरीने सादर करण्यात आलेल्या तक्रारीत म्हटले आहे की, मनुरवाडी येथील जिल्हा परिषद प्राथमिक शाळेत इयत्ता पहिली ते आठवीपर्यंत शिक्षण दिले जाते आणि शाळेत एकूण सात शिक्षक कार्यरत आहेत. मात्र, प्रत्यक्षात दररोज केवळ तीन ते चार शिक्षकच अदलाबदल करून शाळेत उपस्थित राहत असल्याचा आरोप करण्यात आला आहे.
तक्रारीनुसार, अनेक शिक्षक शाळेच्या निर्धारित वेळेत उपस्थित राहत नाहीत. दुपारच्या सत्रात केवळ एक-दोन शिक्षक शाळेत थांबतात, तर इतर शिक्षक वेळेपूर्वीच घरी निघून जात असल्याचे ग्रामस्थांचे म्हणणे आहे. तसेच, विद्यार्थ्यांना दर्जेदार अध्यापन करण्याऐवजी काही शिक्षक मोबाईल फोनच्या वापरात व्यस्त राहत असल्याचाही गंभीर आरोप करण्यात आला आहे.
याशिवाय, शाळा निर्धारित वेळेपूर्वीच बंद करण्यात येत असल्याने विद्यार्थ्यांचे मोठ्या प्रमाणात शैक्षणिक नुकसान होत असल्याची खंत पालक व ग्रामस्थांनी व्यक्त केली आहे. या संदर्भात ग्रामस्थांनी संबंधित शिक्षकांना अनेक वेळा तोंडी सूचना देऊन परिस्थिती सुधारण्याचा प्रयत्न केला, मात्र त्याकडे दुर्लक्ष करण्यात आल्याचा आरोप तक्रार अर्जात करण्यात आला आहे.
या पार्श्वभूमीवर ग्रामपंचायतीने मुख्य कार्यकारी अधिकाऱ्यांनी स्वतः या प्रकरणाची दखल घेऊन मनुरवाडी येथील जिल्हा परिषद शाळेची तात्काळ चौकशी करावी आणि कर्तव्यात कसूर करणाऱ्या संबंधित शिक्षकांवर कठोर प्रशासकीय व कायदेशीर कारवाई करावी, अशी मागणी केली आहे.
दरम्यान, या तक्रारीची प्रत जिल्हा परिषद बीडचे शिक्षणाधिकारी तसेच माजलगावचे आमदार प्रकाशदादा सोळंके यांनाही देण्यात आली आहे. या प्रकरणामुळे तालुक्यातील शिक्षण व्यवस्थेवर प्रश्नचिन्ह निर्माण झाले असून, प्रशासन यावर कोणती कारवाई करते याकडे ग्रामस्थांचे लक्ष लागले आहे.
या निवेदनावर सरपंच संजय बडवणे, माजी सरपंच जयराम गायकवाड, ग्रामपंचायत सदस्य पुरुषोत्तम पवार, ग्रामपंचायत सदस्य विकास हरकाळ, ग्रामपंचायत सदस्य सखारामजी ढगे, शालेय व्यवस्थापन समिती सदस्य माऊली शेळके, शरद काळे यांच्यासह अनेक ग्रामस्थांच्या स्वाक्षऱ्या आहेत.

