औंढा नागनाथ देवस्थान परिसरात पेढे विक्रेत्यांवर धडक कारवाई; परवाना नसलेले दुकान सील
ज्ञानेश्वर कोसलगे मराठवाडा विभागीय संपादक, ॲक्टिव्ह मराठी न्यूज

औंढा नागनाथ देवस्थान परिसरात पेढे विक्रेत्यांवर धडक कारवाई; परवाना नसलेले दुकान सील
औंढा नागनाथ |( प्रतिनिधी) दिनांक ४ जुलै. हिंगोली जिल्ह्यातील बारा ज्योतिर्लिंगांपैकी एक असलेल्या औंढा नागनाथ देवस्थान परिसरात अन्न व औषध प्रशासन विभागाने (FDA) धडक कारवाई करत परवाना (लायसन्स) नसलेल्या पेढे विक्रेत्यांवर कारवाई केली. वैध अन्न नोंदणी अथवा परवाना नसल्याचे आढळून आल्याने संबंधित विक्रेत्याचे दुकान तात्पुरते सील करण्यात आले. तसेच परवाना प्राप्त होईपर्यंत व्यवसाय बंद ठेवण्याचे निर्देश देण्यात आले.
‘सेफ फूड, सेफ महाराष्ट्र’ मोहिमेअंतर्गत देवस्थान परिसरातील मिठाई विक्रेत्यांची तपासणी करण्यात आली. या तपासणीदरम्यान अन्न सुरक्षा नियमांचे पालन होत आहे का, याची पाहणी करण्यात आली. काही ठिकाणी नियमांचे उल्लंघन आढळल्याने संबंधितांवर कारवाई करण्यात आली. तसेच खव्याचे नमुने तपासणीसाठी घेण्यात आले असून निकृष्ट दर्जाचा साठाही नष्ट करण्यात आला.
देवस्थान परिसरात येणाऱ्या लाखो भाविकांच्या आरोग्याच्या दृष्टीने ही कारवाई महत्त्वाची असल्याचे प्रशासनाने स्पष्ट केले असून, सर्व अन्न व्यावसायिकांनी वैध परवाना घेऊनच व्यवसाय करावा, अन्यथा कठोर कारवाई करण्यात येईल, असा इशाराही देण्यात आला.
ज्ञानेश्वर कोसलगे
मराठवाडा विभागीय संपादक, ॲक्टिव्ह मराठी न्यूज.


