थकीत मानधनासाठी राज्यव्यापी काम बंद आंदोलनाचा इशारा*
अहिल्यानगर प्रतिनिधी :अस्मिता मिसाळ अँक्टिव्ह मराठी न्यूज.

*थकीत मानधनासाठी राज्यव्यापी काम बंद आंदोलनाचा इशारा*
अहिल्यानगर प्रतिनिधी अस्मिता मिसाळ. दिनांक २८/५/२०२६
पाणी पुरवठा व स्वच्छता विभागातील कंत्राटी कर्मचाऱ्यांचा शासनाला इशारा;
*१ जूनपासून आंदोलन छेडणार*
महाराष्ट्र राज्य गट संसाधन केंद्र (पाणी व स्वच्छता) कंत्राटी कर्मचारी संघटनेच्या वतीने पंचायत समिती अंतर्गत कार्यरत असलेल्या गट संसाधन केंद्रातील (BRC) कंत्राटी कर्मचाऱ्यांच्या प्रलंबित मानधनाच्या प्रश्नावर राज्य सरकारला निवेदन देण्यात आले असून, मागण्या मान्य न झाल्यास राज्यव्यापी काम बंद आंदोलन छेडण्याचा इशारा देण्यात आला आहे.
सदर निवेदन पाणी पुरवठा व स्वच्छता मंत्री ना. गुलाबराव पाटील यांना देण्यात आले असून, राज्यातील पंचायत समिती अंतर्गत पाणी व स्वच्छता विभागात कार्यरत गट समन्वयक व समूह समन्वयक कर्मचारी अनेक वर्षांपासून प्रामाणिकपणे सेवा बजावत असल्याचे निवेदनात नमूद करण्यात आले आहे. ग्रामीण भागातील पाणी पुरवठा योजना, स्वच्छ भारत अभियान तसेच जल जीवन मिशन यांसारख्या महत्त्वाकांक्षी योजनांची अंमलबजावणी करण्यासाठी हे कर्मचारी सातत्याने कार्यरत असल्याचे संघटनेने स्पष्ट केले.
मात्र मागील डिसेंबर २०२५ ते एप्रिल २०२६ या कालावधीतील तब्बल पाच महिन्यांचे मानधन अद्याप मिळाले नसल्याचा आरोप कर्मचाऱ्यांनी केला आहे. मे महिनाही संपत आला असून एकूण सहा महिन्यांपासून मानधन मिळाले नसल्याने कर्मचाऱ्यांवर आर्थिक संकट ओढावले आहे. घरखर्च, मुलांचे शिक्षण, वैद्यकीय खर्च आणि दैनंदिन गरजा भागविणे कठीण झाले असल्याची व्यथा कर्मचाऱ्यांनी निवेदनातून मांडली आहे.
यापूर्वीही वरिष्ठ अधिकाऱ्यांकडे वारंवार तोंडी व लेखी पाठपुरावा करूनही केवळ आश्वासने मिळाली, मात्र प्रत्यक्षात कोणतीही कार्यवाही करण्यात आली नसल्याचा आरोप संघटनेने केला आहे. शासनाच्या उदासीन भूमिकेमुळे कर्मचाऱ्यांमध्ये तीव्र असंतोष निर्माण झाल्याचेही निवेदनात नमूद करण्यात आले आहे.
संघटनेच्या प्रमुख मागण्यांमध्ये प्रलंबित संपूर्ण मानधन तात्काळ कर्मचाऱ्यांच्या बँक खात्यात जमा करणे, तसेच मानधनाचा प्रश्न कायमस्वरूपी निकाली काढणे यांचा समावेश आहे. ३० मे २०२६ पर्यंत प्रश्न सुटला नाही तर १ जूनपासून राज्यभरातील गट संसाधन केंद्रातील कर्मचारी पूर्ण वेळ काम बंद आंदोलनात सहभागी होणार असल्याचा इशारा देण्यात आला आहे.
आंदोलनाच्या पहिल्या टप्प्यात १ जून ते ५ जूनदरम्यान जिल्हा परिषद कार्यालयासमोर धरणे आंदोलन करण्यात येणार आहे. दुसऱ्या टप्प्यात ८ जून रोजी राज्यस्तरीय कंत्राटी कर्मचारी जिल्हाधिकारी कार्यालय जळगाव ते मंत्री गुलाबराव पाटील यांच्या निवासस्थानापर्यंत पायी यात्रा काढून धरणे आंदोलन करणार आहेत. तिसऱ्या टप्प्यात मागण्या मान्य होईपर्यंत राज्यव्यापी काम बंद आंदोलन सुरू ठेवण्याचा निर्धार संघटनेने व्यक्त केला आहे.
या आंदोलनामुळे पाणी व स्वच्छता विभागाचे विविध कामकाज ठप्प होण्याची शक्यता असून, त्यातून निर्माण होणाऱ्या परिस्थितीस शासन आणि प्रशासन जबाबदार राहील, असेही निवेदनात नमूद करण्यात आले आहे.
सदर निवेदनावर राज्य सचिव जयंत वर्मा आणि राज्याध्यक्ष विलास निकम यांच्या स्वाक्षऱ्या असून, मुख्यमंत्री, उपमुख्यमंत्री, प्रधान सचिव, अभियान संचालक, जिल्हाधिकारी तसेच संबंधित विभागीय अधिकाऱ्यांना निवेदनाच्या प्रती पाठविण्यात आल्या आहेत.
अहिल्यानगर जिल्हा सचिव हरिश्चंद्र कु-र्हे व जिल्हा अध्यक्ष येशूदास खरात व सर्व सहकारी यांनी सदरचे निवेदन मा.प्रकल्प संचालक राजेंद्र देसले यांना दिले आहे . प्रतिनिधीअस्मिता मिसाळ ॲक्टिव्ह मराठी न्यूज. अहिल्यानगर.

